Leupië -Seu-uëm Eropa Ngon Australia

Beurita Lam Bahsa Aceh | acehtraffic.com- Dalam sithôn njang dua blah buleuën, chaidjih tiëp aché dan awai thôn Masehi, ban sigom wilajah Irupa keunong musém lupië.  Musém lupië njan lhèë buleuën meuawai kira² Novémbèr sampo aché Februari dan tiëp meuganto musém minimal tiëp go njan pih sakét phui lam sithôn

Njang paléng teuga lupië na keuh Sweden, Norway, Findland, Rusia dan Iceland sabab neugara² njan meubataih deungon kutôb blah baroh.  Meusabeub karap tiëp uroë Tuhan lupië, nan nanggroë njang keuseuneulheuh teusebot njan sampo lakap droëdjih seubago "Iceland" (Nanggroë Éh).

Lam buleuën Djanuari njoë keuh puntjak dari pada musém lupië njang meunjoë malam di lua rumôh suhu kon lé Nol deuradjat meutapi djeut sampo minus 20 °C dan teungoh uroë seukita minus 5 °C. 

Ka lubèh lupië nibak leumari éh,keubit that sidjuëk!  Meunjoë di dalam rumôh bah that pih na AC su-uëm kadang² beuna sitokén atawa silop keu lapék gaki bak aleu rumôh.

Na njang meuhaba bak talipun darirakan di Atjèh sira teumanjong meunjoë ka biasa tinggai lam nanggroë lupië meunan pasti ka biasa tjit adaptasi deungon tjuatja?

Meubida batjut sabab di nanggroë njang na peut boh musém meuganto tiëp lhèë buleuën sigo, kulét tanjoë ureuëng Asia hana biasa, tamah lom awak droëdjih bulék mantong meunjoë lupië teutap dingui djakét teubai lua - dalam karap man saboh tubôh. 

Di nanggroë Atjèh njang su-uëm tiëp uroë dan djareung that meuganto musém, ban ka tarék uroë bah that pih hana hudjeun, kadang² pajah na pajong meunjoë tubiët u lua.  Meunan tjit lagèë rumôh di Malaja njang na kipaih angén saboh sapo lam bilék.  Djadi teutap hana teubiasa dan pajah that seusuai droë meunjoë hai tjuatja.

Saldju njang awai tundjai that ditron di Sweden sampo djino hana cajé lom, bak kajèë putéh meusalop deungon saldju, bak binéh djalan deuh meutjak² kreuh lagèë aneuk batèë,  ië hudjeun ateuh ubong rumôh kreuh djeut keu katja éh. 

Majoriti hana so njang galak tubiët u lua rumôh peuë lom sampo keuridja dilapagan lagèë lam leumari éh raksasa, tamah lom kajém keunong peunjakét lagèë flu, batôk, deumam dan tjrah bak bibi.

Biasadjih meunjoë hana that peureulèë ureuëng hana geutubit u lua ladom tjit keumarom lam rumôh aktiviti deungon keuluarga.  Meunjoë na peundapat njang galak keu musém saldju biasadjih keu aneuk miët meuén rhôm² saldju, meunan tjit keu ureuëng rajek untôk meureuno ski njang ka djeut keu salah saboh ulah raga.

Keuadaan seubalékdjih tjuatja blah déh wilajah rap tunong bumoë seukita Australia.  Disidéh, djino teungoh puntjak musém su-uëm, dan na teuka haba lapôran dari sjèëdara Atjèh njang tinggai disidéh geupeugah deuh tho ban sipandjang djalan.   

Le keubôn teubèë dum di Pantai Timu Queensland, Bundaberg.  Disinan, leumo djipadjoh naleuëng tho meutapi teumbôn² kon lagèë leumo di Atjèh djipadjoh naleuëng idjo tapi pidjuët². 

Ban geupeugah meunan tingat teuh hai njan djeut keu tamsé saban lagèë ureuëng Atjèh geuduëk ateueh pipa gaih, tangki minjeuk dan geuduëk ateuëh bukét meuh meutapi deuëk deungon luweuë puntong, ngon panjot tjulôt sabab meuthôn² mantong dalam peundjadjahan.

Haba barô laén teuka dari nanggroë luah njan, hawa musém su-uëm kali njoë di kuta rajek Sydney sampo meucatèt trok an 40 - 45 °C dan meutuléh bak beurita BBC seubago paléng su-uëm lam sidjarah Australia seudjak Djanuari 1939. 

Ureuëng peugah bak TV akibat pengarôh global "Climate Change", dan djino ka troh masa njan batjut-batjut tiëp thôn.  Akibat su-uëm that maka meusambong efek laén tjit lom lagèë tutong huteun.  

Huteun tutong ladom akibat faktor alam njang tanoh khuëng that djareung hudjeun, tamah lom tarék uroë seuhingga batjut sagai na apui bak ôn kajèë tho ladju tutong, peuë lom dipot lé angèn.

Pihak peumerintah Australia keudroë kalheuh geupeuingat rakjat droë geuh djeuôh seugolom teudjadi untôk meudjaga² bék sampo meupaloe miseu teukeudi beuntjana tutong huteun.   

Australia tiëp thôn langganan tutong huteun dan na tom peurnah kurbeun djiwa djeut keu tragedi nasional musém su-uëm thôn 2009 sampo dikheun "Black Saturday" sabab meuninggai ureuëng 173 droë akibat tutong huteun di nanggroë bagian Victoria.

Leumbaga tilék tjuatja nasional Australia lam website geupeugah, lam masa meupadum uroë ukeu tjuatja man saboh Australia mantong teutap su-uëm, diwatèë njang saban angén teuga that dipot sampo teudjadi tornado apui lam huteun. 

Seubago haba serius, media di nanggroë njan pih geutuléh narit Peurdana Meuntroë Australia Julia Gillard njang geubri nasihat untôk
piké keuseulamatan njang lumbôi sa watèë na tumutông.

 "Peusan ulôn hanja saboh.  Seugala hai ôseuha keu hudép, sabeub njan han keumah teuganto, bék padoli padum jum hareuta tinggai," seubot PM lagèë dipeot lé BBC.[]

Ditulis oleh Asnawi Ali- Örebro, Sweden: Aleuhad, 20-01-2013